**SELAMAT DATANG DI WEBSITE YKPD GBKP ALPHA OMEGA KABANJAHE **

ANAK CACAT,  ISE ERDIATE ?

 

 Anak cacat (ikataken pe anak berkebutuhen khusus) merupaken perbeben ras baban simberat ibas keluarga, masyarakat bagepe pemerintah. Bas keluarga menjadi beban psikologis,  itengah masyarakat merupaken persoalen sosial si maun la teraloken ras nuduhken sikap si kurang simpati. Engkai maka ia cacat ? dosana nge,  tah dosa orangtuana ?, maun la sigejap enggo sihakimi. Jesus ngataken maka labo erkiteken dosana bagepe labo erkiteken dosa orangtuana tapi gelah kuasa ras pendahin Dibata teridah arah anak cacat enda. 

Adi bage kai banci sibahan nandangi anak cacat enda ?. Peturut saja erkiteken ei labo urusenta ?  Lang. GBKP ibas kekurangenna, 23 tahun silewat terdilo guna menghimpun ras melayani  anak cacat enda khususna cacat mental (tuna grahita) aminna pe merupaken perbeben  simberat ras proses si ndekah. Ngergai kemanusiaan la sekedar statemen belaka tapi tindaken nyata perwujuten kekelengen sesama manusia.

Bageme ibas 21 Juli 1988, GBKP  ndirikan Yayasan Kesejahteraan Penyandang Cacat Alpha Omega enda, janah tanggal enda me iperingeti sebagai ulang tahun Alpha Omega enda. Ibas Sidang Sinode silewat, yayasen enda enggo iputusken menjadi Badan. Alu bage adi mbarenda YKPC (Yayasan Kesejahteraan Penyandang Cacat) Alpha Omega gundari jadi BKPC (Badan Kesejahteraan Penyandang Cacat) Alpha Omega. Aminna bagepe  lalap denga ibelasken YKPC Alpha Omega. Ibas perdalinenna, Alpha Omega enda enggo mentasi melala tantangen, tapi erpalasken kekelengen Tuhan, pelayanen man anak cacat  enda banci  itingkatkan  tahun ku tahun, amina pe melala denga ka nge siidah kekurangenna.

Ibas tahun silewat anakta sidilaki ndatken 2 medali eme Medali Emas ibas lari 100 meter ras Medali Perunggu ibas lempar bola. Bagepe ibas tanggal 25 Oktober 2011 ipeberkat ka 2 kalak anakta sidiberu jadi utusen Propinsi Sumatera Utara ku Kejuaraan Tingkat Nasional i Pekanbaru ibas cabang olahraga lari 100 meter. Jenari ibas rangka Perayaan Hari Ulang Tahun Penyandang Cacat Sedunia, anak anak Alpha Omega radu ras anak anak Yayasan Penyandang Cacat si deban se Sumatera Utara ibas tanggal 8 Desember 2011 enda erbahan Konser anak anak berkebutuhen khusus ”Terbang bersama Sang Garuda”  i Gedung Selekta Medan. Emaka itenahken kita guna naksikenca.

Visi Alpha Omega eme :  Mensejahterakan Geluh Penyandang Cacat. Guna mewujudkan visi enda,  Alpha Omega erbahan  program panti  ras sekolah. Melalui panti  enda anak-anakta penyandang cacat iasuh, iawasi, ikembangken, ras irehabilitasi alu kegiaten menerapken pola nggeluh  teratur : teratur perpan, teratur perpedem ras teratur perkuturai.  Memaksimalken kesehaten anak alu kegiaten pemeriksaan kesehaten rutin, mereken  pangan bergizi, kebersihan ras keindahen lingkungen.  Alu bage banci nggeluh mandiri ras sejahtera. Ibas panti  enda anak-anak iajari nggeluh 5 mandiri eme mandiri man ras minem, ridi, tunduh,  erpakaian ras mandiri lingkungen. Anak-anak si jumlahna  89 kalak ikelompokken jadi 3  eme  mampu didik, mampu latih ras  mampu rawat.

Guna meningkatken kesehaten anak enggo ilitken tenaga fisiotherapy ras perawat bagepe ruang fisiotherapy rikut  peralatenna. Emaka genduari anak-anakta lanai ibaba terapi ku ingan sideban. Ibas pemeriksaan kesehaten enda, enggo lit kerjasama ras Yayasen Kesehaten GBKP guna pemeriksaan rutin.

Ibas meningkatken ketrampilen anak-anak maka workshop (pertukangen, jahit/sulam, bordir, tenun,  pembatiken ras erbahan pengepel lantai) , latihen pertanian (rimo  ras kopi)  peternaken lembu , show room,  kantin ras guest house terus ikembangken alu pengarapen kerina enda banci jadi sarana pembelajaren/latihen sekaligus sebagai penunjang dana Alpha Omega.

Vocational Centre (Pusat Pelatihan/ketrampilen) Alpha Omega i Desa Lingga Kecamaten Simpang Empat lit belangna 7,5 Ha sebagai lokasi pertanian ras peternaken. Salah sada program gundari eme mengembangken lokasi sitenang ras mejile  enda jadi salah sada ingan  wisata bagepe ingan retreat. Ibas lokasi enda lit rumah mandiri, gedung serbaguna, gedung penunjang sibanci ipake jadi ingan rapat ras retreat. Ibas lokasi enda lit tading 5 keluarga pengasuh  ras 14 kalak anakta simandiri.  

Ibas lokasi enda iterapken pertanian terpadu arah pengolahen pakan ternak, pupuk organik ras tanamen hortikultura.  Kotoren lembu  iolah jadi biogas siipake guna  erdakan (memasak). Aminna pe langa mencukupi kebutuhen tapi enggo banci mengirit biaya operasional. Piga-piga temueta enggo reh studi banding   guna mpelajari biogas enda.

Pengembangen lokasi enda seh asa genduari langa bo bagi siarapken kita erkiteken terkendala bas penerangen (listrik). Ngayak genduari untuk penerangen ipake denga genset (ipegeluh jam 18.30 – 21.30 WIB) emaka iumputi lampu teplok seh erpagi-pagi, bage me teptep wari. Banci sibayangken kuga anakta si cacat mental enda adi ku kamar mandi kanting ka lampu teplok enda, lit ka nge deba lanai pakai lampu, cukup feeling saja (erkiteken enggo terbiasa). i rumahta mungkin biangta, babita, manukta  pe enggo ilampui. Erkiteken genset enda, emaka biaya operasionalna pe cukup mbelin (boros).  Enggo me iban piga-piga kali  permohonen ku PLN tapi seh asa genduari langa lit realisasina. Emaka ateta sipasang me listrik enda alu biaya sendiri namun dana guna sie la ka sitik.  Biaya guna pemasangen jaringen sidauhna lit 1400 meter i pasar belin nari rikut ras energina enggo ihitung  Rp 250 juta. Emaka  guna ngelitken dana enda sipersada ka me gegehta, tah apai kita sierdiate ras erpemere.

Ibas Matius 25:40 : ”Kai si ibahanndu man sekalak simusilna ibas seninangKu enda, eme situhuna perbahanendu man bangKu”.

Kuga nge ninta ?????

                                                                                  Pt. Ir. Mulia Barus, M.Si
Ketua  YKPC Alpha Omega